雖然見過有人唔鐘意著鞋打波，但無可否認籃球鞋係籃球運動中不可或缺的重要部份，就正如櫻木想打波都要先同晴子小姐去買鞋。TrashTalk 今期邀請曾代表香港參加 Sneaker Battle (鞋族戰記)波鞋收藏家 Kidd Poon 同大家細訴同籃球、主場間既故事。

S : SLAB   
K: Kidd Poon

S:幾時開始鍾意打籃球？

K:由中三開始接觸NBA，成班同學開始打籃球，就愛上籃球一直打到依家，有時一班舊同學仲會組隊打業餘籃球聯賽。

S: 話時話邊度係你「主場」？

K: 主場當然係京士柏啦，當年間中學剩係得一個籃球架，想跟隊一定跟到2046， 所以Lunch Time 同埋放學，一定去學校附近嘅京士柏打到天昏地暗！星期六同日都會約埋班同學去跟隊！個個禮拜啲對手都係熟口熟面，好似我朋友叫Turbo、老鼠等等都係場上面識，講番都已經係成廿幾年前嘅事。

S: 「主場」附近同朋友有咩聚腳點？
K: 打完波一定同d同學去好景巡吓舖（當年仲未係有四仔，只係有 GAME 睇) ，copy 返屋企打到瞓覺為止。

S: 如果而家比個機會你返去「主場」，你夠唔夠薑跟隊踩場？
K: 唔會喇，而家打波都係打室內多，如果仲烈日當空打街場，我怕會上A1 呀。

S: 籃球帶比你咩回憶？
K: 學生時代為咗打波而唔食Lunch，下晝上堂件裇衫已經濕到透哂露哂點，不過好在係讀男校姐。

S: 打波時最擅長係咩技術？
J: 本身進攻唔係自己強項，我通常都係做好防守及為隊友製造機會！有時會係外圍放吓冷箭。

S: 最欣賞現役邊位NBA球星？
K: 以前最欣賞嘅球星係Jason Kidd 同埋 Steve Nash，都係可以令隊友能力提升嘅球員。如果要揀現役嘅一位球員的話，我會揀林書豪，一來有華人情義結，二來我覺得佢真係有提升隊友能力嘅功用，只係欠缺一個機會，希望下季去到網隊可以有多吋啲出場時間啦！

S: 你最鍾意嘅籃球鞋係邊對？

J: 我會揀AIR JORDAN V，佢係我我第一對嘅Air Jordan。反光鞋舌，透明膠鞋底，著住佢日與夜都咁型，氧化變黃仲有味道，所以長期都有一兩對Retro 看門囗。