TrashTalk01
JYD專訪

2015/11/15

TrashTalk01

SLAB 專訪頭炮我地搵黎香港波鞋界神級收藏達人 JYD (Jonathan Yiu) 黎同大家吹吹水,據我地所知JYD佢都係籃球狂熱份子,究竟佢點解鍾意籃球,同埋邊度係佢「主場」,以下內容可逐一為大家拆解。

1

S – SLAB
J – JYD

S: 幾時開始鍾意打籃球?
J: 大概12歲開始鍾意打籃球,大家都知踏入青春期點都鍾意搵啲嘢打吓,咁啱電視播NBA,見到啲球星幾型,跳黎跳去冇時停,所以鍾意咗打籃球直到而家,都有十幾年喇。

S: 籃球帶比你咩回憶?
J: 從籃球當中我學識人與人之間相處同溝通,最重要係因為籃球我識到好多朋友,呢點係最難能可貴既地方。籃球對我黎講唔單止係一項運動,而係生活既一部分。

S: 話時話邊度係你「主場」?
J:講到「主場」即係響朵嘅地方,咁就一定要數到「沙田第一城」籃球場。一方面近屋企,另一方面因為細個冇嘢做時就會喺嗰度打波多,打多就識得多人,識得多人就即係人地都識得我,我喺個場留低過唔少腳毛,「主場」不二之選。

S: 「主場」附近同朋友有咩聚腳點?
J: 想當年最鍾意去7仔買自由斟,跟住就去附近公園吹水,記得當年自由斟真係自由斟,真正嘅自由莫過於此,好爽皮。

S: 如果而家比個機會你返去「主場」,你夠唔夠薑跟隊踩場?
J: 點會唔夠薑?不過夠薑唔夠氣。

S: 半場三打三嘅拍檔,你會搵邊兩位做你戰友?
J:  一定係兩位兒時戰友,Sheep & Clememt。因為係相識多年嘅好兄弟,同埋佢地從來冇贏過我。呢啲戰友去邊度搵?

S: 驚唔驚喺街場同女仔打籃球?
J: 正所謂「球場如戰場」、「情場如戰場」,所以我係球場上見到女仔係從來唔會驚,我好享受刻意防守佢,又要故意被甩開嗰種感覺,就好似初戀一樣,回味無窮。

S: 打波時最擅長係咩技術?
J: 以前細個鍾意 Chris Webber,覺得佢好型好瀟灑,所以就模仿佢打法,以高位分波、中距離跳射為主,偶然會插吓花、爆吓籃咁。

S: 對香港籃球文化之見解如何?
J: 就觀察所見,香港籃球發展愈來愈普及,睇甲一籃球聯賽嘅人數愈來愈多,坊間亦有開辦青少年培訓學院。但講到文化,我又唔見得真係好似台灣咁培養到籃球文化出黎,畢竟香港太多人只追隨潮流,希望更多有心人為香港籃球出一分力。

S: 最欣賞現役邊位NBA球星?
J: 包括 KOBE BRYANT 及 CARMELO ANTHONY。
首先KOBE無可否認係NBA最佳球員,如果只計個人技術,我認為KOBE比起Michael Jordan有過之而無不及,同埋我欣賞佢對勝利嗰種堅持同執著。佢嘅成功話到比我地聽呢個世界無不勞而獲。

至於MELO,其實睇佢打波係好開心,因為佢成日笑!嬴又笑、輸又笑,睇佢打波真係人生滿希望,極度正面。
S: 令你最深刻嘅籃球鞋係邊對?

J: 一定係 AIR JORDAN XII,因為個廣告真係好型,亦都係我第一對AIR JORDAN。你地睇睇下面條 link 就會明架喇。

4

3

2

JYD2

 

 

Air Jordan XII Commercial “Frozen Moment”

 

Air Jordan 12 Commercial “Challenge Me”