舊物舊事
自由斟

2015/11/19

自由斟

相信各位讀者睇到題目時都不禁搖頭嘆息,我哋到底有幾耐冇去過7仔或OK買杯「自由斟」飲。想當年,呢杯飲品真係窮人恩物,無論Lunch食飯或者打波都總會買杯黎飲,因為細個心諗買汽水點都抵過買礦泉水,無理由蝕架嘛。所以「自由斟」的確係陪伴我咃成長嘅舊事舊物。

香港地生活迫人,加上回歸祖國後不斷被赤化,民主自由逐步被蠶食,唯一能夠真真正正享有並確實感受到自由,就係自由狂斟自由斟嗰一刻!只係付出五蚊雞就可以做豪客,喪飲汽水,仲要幾個麻甩仔好似輪大米咁輪住黎飲,但又驚比阿姐望到,嗰種感覺真係好爽皮。記得啲 friend 個個話離口但實質上冇離,其實都冇介意過,大家你一啖我一啖,最後一定有人大大聲叫「留底」,兄弟之間肝膽相照嘅感情就係咁孕育出來,男人的浪漫正是如此。

講返杯嘢飲,我自己就最鍾意思樂冰加汽水兩溝,打完波之後一大啖思樂冰上腦,嗰下真係好好feel,滿載回憶!

IMG_8863_1800