但呢個世界冇完美嘅人，一直以黎成日被質疑領導能力不足，從未領軍突破季後賽第一圈，直頭係好似中咗魔咒咁，諗住幫佢打上「怪談」問吓，點知咁啱連「司徒法正」師父隻眼都受傷出埋事，嗰時就知呢獲冇得救。你亦都可以話緣份天註定，就好似我地有時溝女咁，永遠都徘徊晌好朋友階段，即係第一輪，見到好似有啲機會喇，想關係更進一步時就會被拒絕一樣道理。第二輪季後賽從來都冇 T-Mac 份，「原來沒有，從來都沒有」⋯⋯ 大概如此，感覺就好似做兵咁，相信好多人都明白，有歷練嘅籃球迷一定鍾意佢，所以從來冇聽人講過話唔鍾意 T-Mac，根本佢職業生涯就代表住男人的浪漫，想得到但又從來得唔到，機會總係擦身而過。

到2013年生涯最後一季加盟馬刺入到總決賽，諗住標尾會，竟然又比熱火反底，戴咗一半隻冠軍指環都要除返出黎呀陰公，賽後記者會 Lebron 仲多謝 T-Mac，話自己一直好欣賞佢 ⋯⋯ 屌！講到我都想喊，真心慘！人言可畏，比人講得多，加上受傷患影響，佢最後都認命宣布退休，結束16年職業球員生涯。

啲人成日話佢冇鬥心，可能係我偏袒，我覺得係長期背傷影響佢職業生涯，因為當年我有幸同佢短聚訪問，見到佢坐一陣又企吓晌身話腰痛，仲話本身想暑假休息，但係唔想亞洲球迷失望所以先照原定計劃繼續行程，我真心佩服！球星黎講佢人品係非常好，完全冇架子，可以同我地呢啲普通人有講有笑真係難得！我唔明啲仆街點解晌佢職業生涯尾段，成鳩日要恥笑佢加盟馬刺搏攞冠軍，又話佢剋死馬刺等等，其實球員受傷冇人想，佢自己先最慘，邊個唔想健健康康冇病冇痛架？邊個唔想風風光光退休高掛球衣？我感謝 T-Mac 帶比我嘅所有回憶，見佢退休後生活都幾開心，作為球迷都算安慰。

T-Mac 生涯精彩片段 (堅好睇)：
http://youtu.be/FTMFHjKhM4s

http://youtu.be/zXCb2UBvXHM

35秒入13分：
http://youtu.be/e3EqY5gPrcU